ارتفاع ضغط الشريان الرئوي هو مرض خطير بييجي لبعض الناس و لازم يتشخص صح عشان يتعالج بالطريقه المناسبه. الشريان الرئوي هو الشريان الي بيودي الدم من البطين الأيمن للرئه عشان يوصل اكسجين للدم و بعدها الدم بيرجع من الرئه للأذين الأيسر و بعدين البطين الأيسر و يروح على أعضاء الجسم عشان يغذيها بالكسجين. ارتفاع ضغط الشريان الرئوي بيحصل نتيجه لأسباب كتير هنتكلم عنها بالتفصيل
١. ايه هي أسباب ارتفاع ضغط الشريان الرئوي؟
فيه أسباب كتير جدا و متقسمه لخمس أنواع:
- النوع الأول: ده الي بيكون بسبب عيب خلقي زي ثقب في القلب أو مرض مناعي أو تليف في الكبد زي نتيجه بلهارسيا أو وراثي أو ممكن يكون بدون سبب.
- النوع التاني: ده بيبقى نتيجه مشكله في الجانب الأيسر من القلب زي ضعف في عضله القلب أو مشكله في الصمام الميترالي أو الأورطي زي ارتجاع أو ضيق أو رفرفه أذينيه.
- النوع التالت: ده بيبقى نتيجه مشكله في الرئه زي حساسيه الصدر أو سده رئويه مزمنه أو تليف بالرئه.
- النوع الرابع: ده بيبقى نتيجه حصول جلطه قديمه في الشريان الرئوي و اتكلمنا عن جلطه الرئه في مقال سابق.
- النوع الخامس: ده ليه كذا سبب زي أمراض الدم أو أمراض الغده الدرقية أو الأمراض الي بتصيب أعضاء مختلفه في الجسم.
٢. ايه هي أعراض ارتفاع ضغط الشريان الرئوي؟
أعراض ارتفاع ضغط الشريان الرئوي كتير زي:
- نهجان مع مجهود قليل
- وجع في الصدر.
- ضربات قلب سريعة
- كحه و ممكن تكون كحه بدم
- تورم الرجلين
- دوخه أو اغماء
٣. ازاي بيتشخص ارتفاع ضغط الشريان الرئوي؟
لو حسيت بأعراض زي الي قولنا عليها بتروح لدكتور القلب فورا و بعد ما بياخد تاريخ مرضي مفصل و يعمل فحص دقيق هيطلب فحوصات زي رسم القلب و موجات صوتية على القلب و على حسب شكوكه في نوع معين من ارتفاع ضغط الشريان الرئوي زي تحاليل أو أشعه مقطعيه على الصدر بالصبغه أو مسح ذري على الرئه أو اختبار وظائف تنفس أو قسطره للشريان الرئوي و غيرها على حسب شك الدكتور في نوع معين من ضغط الشريان الرئوي.
٤. ايه هو علاج ضغط الشريان الرئوي؟
النوع الأول من ضغط الشريان الرئوي في أغلب الحالات هو الي بياخد علاجات عشان تقلل ضغط الشريان الرئوي زي أدويه الفياجرا و الستاركوبركس و فيه أدويه تانيه زي البوسنتات أو البالميبروف أو الأوبسميت و الأبترافي و أدويه مضاده لمستقبلات الكالسيوم و دي كلها أدويه بتقلل ضغط الشريان الرئوي.
انما باقي الأنواع الدكتور بيحاول يعالج السبب سواء كان من الجانب الأيسر من القلب أو من الرئه أو غيرها و بالتاي ضغط الشريان الرئوي بيقل لو السبب اتعالج. في بعض الأحيان ممكن الدكتور يكتب على أدويه من الي بتتكتب للنوع الأول و ده بيرجع للدكتور.
النوع الرابع الي بيكون سبب جلطه سابقه في القلب ممكن المريض يتعمله جراحه قسطره علاجيه للشريان الرئوي عشان تتشال الجلطه الموجوده و ده الي الدكتور بيحدده حسب الحاله.
٥. بيعيش اد ايه مريض ارتفاع ضغط الشريان الرئوي؟
مرض ارتفاع ضغط الشريان الرئوي هو مرض خطير و معقد و بيختلف من مريض لمريض و الأعراض شديده و لا لأ و هل فيه أمراض تانيه عنده. أهم حاجه هو ان مريض ارتفاع ضغط الشريان الرئوي يتشخص و يتعالج في أسرع وقت ممكن لأن الدراسات أثبتت ان ده بيحسن حاله المريض بطريقه كبيره جدا. تاني حاجه ضروري أن المريض يلتزم بنظام العلاج حتى لو متعب بالنسبه له لأن توقيف العلاج ممكن يعمل انتكاسه. برده المريض لازم ياخد تطعيمات الانفلونزا و الالتهاب الرئوي الي الدكتور يحددهاله لأنها بتقلل فرص حصول انتكاسات في المرض.
في النهايه مرض ارتفاع ضغط الشريان الرئوي مرض خطير و لازم يتشخص و يتعالج بطريقه صح بس كل يوم في أدويه جديده بتتطلع لعلاج ضغط الشريان الرئوي و بأعراض جانبيه أقل.
