الكركديه والضغط.. هل هو فعلاً مفيد؟ والساقع أحسن ولا السخن؟
ناس كتير بتشرب كركديه على إنه حل سحري للضغط، بس يا ترى ده حقيقي؟ وأهم سؤال: الساقع هو اللي بيقلل الضغط ولا السخن؟ وهل ممكن نعتمد عليه لوحده ونسيب الأدوية؟
تعالى نجاوب على كل الأسئلة دي بطريقة بسيطة وسهلة.
إيه هو الكركديه أصلاً؟
الكركديه هو نبات طبيعي بنشربه كمشروب سخن أو ساقع، وطعمه لذيذ ومنعش، بس الأهم من كده إنه بيأثر على ضغط الدم بشكل مباشر.
الكركديه الساقع بيقلل الضغط
أيوه، الكركديه الساقع فعلاً بيقلل ضغط الدم، وده مثبت في دراسات علمية. فيه مواد اسمها "أنثوسيانين" بتحسن الدورة الدموية وبتساعد في ارتخاء الأوعية الدموية، وده بيخلي الضغط ينزل.
طيب بينزله قد إيه؟
الدراسات بتقول إن شرب كركديه ساقع يوميًا لمدة 2 لـ 6 أسابيع ممكن ينزل الضغط الانقباضي (الرقم الكبير) بحوالي 7 لـ 10 درجات، والانبساطي (الرقم الصغير) بحوالي 3 لـ 5 درجات.
وده يعتبر تأثير ممتاز كمشروب طبيعي، بس مش كفاية لوحده في الحالات الشديدة.
الكركديه السخن؟ خلي بالك!
بعكس الساقع، بعض الأبحاث بتقول إن الكركديه السخن ممكن يرفع الضغط أو مايأثرش خالص، وده بيرجع لطريقة التحضير وتأثير الحرارة على المواد الفعالة.
فلو عندك ضغط عالي وعايز تستفيد من الكركديه، الأفضل تشربه ساقع من غير سكر أو بسكر بسيط جدًا.
هل ينفع أستغنى عن الدوا وأشرب كركديه؟
الإجابة بصراحة: لأ.
الكركديه ممكن يساعد كعامل مساعد، لكن مش بديل عن الأدوية، خصوصًا لو ضغطك عالي جدًا أو عندك مشاكل في القلب أو الكلى. لازم تستشير الدكتور قبل ما تعتمد عليه لوحده.
ازاي تشربه بطريقة صح؟
استخدم كركديه طبيعي مش جاهز من السوبر ماركت
انقعه في ميه ساعة أو اتنين في التلاجة واشربه ساقع
متزودش سكر
ماتشربش كميات كبيرة (كوباية يوميًا كفاية)
مين ما ينفعش يشرب كركديه؟
الناس اللي ضغطهم واطي أصلاً
اللي بياخدوا أدوية مدرة للبول أو أدوية ضغط معينة (لازم يسألوا الطبيب)
الحوامل (الأمان غير مؤكد)
الخلاصة:
الكركديه الساقع فعلاً ممكن يساعد في تقليل الضغط، بحوالي 7 لـ 10 درجات في الضغط العالي، لكن مش بديل عن المتابعة مع الدكتور أو العلاج. اشربه باعتدال، ودايمًا خليك متابع ضغطك.
لو عجبك الموضوع ممكن يعجبك كمان موضوعنا عن ازاي تقلل الضغط بطرق طبيعية و من غير أدوية
