وجع القلب أو الذبحه الصدريه عرض خطير الناس بتقلق منه عشان ده بيدل على وجود ضيق في الشرايين الي بتغذي القلب و ممكن لا قدر الله يتطور لجلطه في القلب أو ذبحه غير مستقره لو متعالجتش في الأول. طيب ايه اعراض وجع القلب و ازاي نتعامل معاها؟
١. ايه هي أعراض وجع القلب أو الذبحه؟
بيكون وجع أو تقل أو حرقان في الصدر و ممكن يسمع في الكتف الشمال أو الظهر أو الرقبه أو الفك و بيحصل بعد مجهود زي مشي أو جري أو طلوع سلم أو لو أكلت أكله تقيله. الألم بيفضل موجود من ٥ دقايق لربع ساعه في معظم الحالات
٢. طيب ايه هي المشاكل الصحيه الي ممكن تسبب وجع القلب أو الذبحه؟
الناس المعرضه لضيق الشرايين التاجيه فبيعملها وجع القلب ممكن يكون عنها ضغط عالي أو سكر مزمن أو دهون عاليه . التدخين و قله المجهود و النشاط برده ممكن يعرضوا الواحد لضيق في الشرايين و وجع القلب.
٣. هل فيه أسباب تانيه ممكن تعمل وجع القلب غير ضيق شرايين القلب؟
ممكن طبعا يجيلك وجع في صدرك و ميكونش فيه ضيق في شرايين القلب زي التهاب المعده و التهاب الغشاء الي حوالين الرئه أو القلب و التهاب الرئه نفسه.
٤. طيب ايه هي الفحوصات الي بتتعمل عشان اطمن على القلب؟
الدكتور لو شك أن عندك ضيق في شرايين القلب بيطلب مبدأيا رسم قلب و موجات صوتيه على القلب و تحليل دهون و صوره دم كامله و ممكن على أساسهم يطلب فحوصات تانيه ذي الاشعه المقطعيه على الشرايين التاجيه أو مسح ذري على عضله القلب
٥. اعمل ايه لو جالي وجع في صدري و شاكك انه من القلب؟
تروح لأقرب مستشفى منك عشان يعملولك الفحوصات اللازمه و تعرف سببه القلب و لا حاجه تانيه و عشان تستبعد لا قدر الله لو فيه جلطه أو ذبحه غير مستقره
وجع القلب أو الذبحه القلبيه مرض لا يستهان بيه و لازم تتابع مع الدكتور لو جاتلك أي عرض من الأعراض الي اتكلمنا عليها. اعمل شير لو عجبك الموضوع و متنساش تسيب تعليق.
تعليقات
إرسال تعليق