الضغط الواطي مشكله عند ناس كتير و بالأخص البنات و الناس الي سنها صغير. الضغط الواطي هو ان يكون الضغط أقل من ١٠٠/٦٠ و هنتكلم عن اسبابه و أعراضه و طرق علاجه بطريقه بسيطه.
١. ايه هي اسباب الضغط الواطي؟
ليه أسباب كتير اكترها ان يكون فيه جفاف او نقص مياه في الاوعيه الدمويه نتيجه نقص شرب مياه أو ترجيع أو اسهال. ممكن يكون كمان بسبب انيميا. فيه مشاكل اخطر بتعمل ضغط واطي زي ضعف عضله القلب الي بيحصل نتيجه ان القلب مبيضخش دم كفايه في الأوعيه الدمويه. برده فشل الكبد بيعمل ضغط واطي عن طريق انه مبينتجش البروتينات الي بتحفظ المياه في الأوعية. فيه كمان ان يكون فيه مشكله في الغده الكظرية
٢. ايه هي أعراض الضغط الواطي؟
ناس كتير و بالأخص البنات عندها ضغط واطي بس معندهم أعراض و ده مبيبقاش منه مشكله و مبيتداخدش ليه علاج. بس فيه ناس بيبقى عندها أعراض ذي الدوخه و الضعف العام أو تنميل في .الأطراف
٣. طيب ايه هو علاج الضغط الواطي؟
لو مفيش أعراض الضغط الواطي مفيش داعي للعلاج او انك تاخد ادويه ترفع الضغط ده العكس دي ممكن ترفع الضغط و يبقى عالي. انما لو فيه أعراض أهم حاجه هي شرب سوايل كتير من ٣ ل٤ لتر في اليوم و مش لازم مياه بس ممكن عصاير او مشروبات زي الينسون و النعناع و غيرها. تاني حاجه تحاول تاكل كذا أكله خفيفه في اليوم بمعنى توزع أكلك و أنك متاكلش أكله تقيله لأن ده بيزود هبوط ضغط الدم. بلاش أدويه الي بترفع الضغط لأن زي ما قولنا بتعمل مشاكل. لو فيه انيميا لازم تكشف عشان الدكتور يكتبلك علاج ليها. فيه الاسباب الاخطر زي ضعف عضله القلب و الفشل الكبدي و دي الدكتور المعالج سواء قلب أو كبد أو باطنه بيكتبلها العلاج المناسب و الي مختلف عن علاج الضغط الواطي الي بيجي للبنات و الناس الصغيره في السن و ده بيبقى بسيط و سهل التعامل معاه.
موضوع حلو جدا
ردحذف