الصيام المتقطع هو نظام أكل ناس كتير مهتمه بيه عشان التخسيس. ايه هو الصيام المتقطع ده و هل مفيد و لا لأ؟ ده الي هنشرحه في المقال ده
١. ايه هو الصيام المتقطع؟
الصيام المتقطع هو نظام أكل للتخسيس بحيث ان الشخص بيصوم فتره و ياكل في الفتره الباقيه.
٢. الصيام المتقطع بيبقى كام ساعه صيام في اليوم؟
فيه ٣ أنظمه للصيام المتقطع و هما
- ١٦/٨: و ده بيبقى صيام ١٦ ساعه في اليوم و تاكل في ال٨ ساعات الباقيين و بيبقى وقت الكل في الاغلب من ١ ل ٩ كل يوم
- يومين كل اسبوع: و ده بيبقى عباره عن صيام يومين كل اسبوع.
- ٥/٢: و ده بيبقى انك تاكل من ٥٠٠ ل٦٠٠ كالوري في يومين مش ورا بعض و باقي الاسبوع تاكل عادي
نظام ١٦/٨ هو النظام الي معظم الناس بتمشي عليه.
٣. هل ممكن اشرب حاجه خلال فتره الصيام؟
ممكن تشرب مياه او شاي او قهوه بس من غير سكر او سكر قليل جدا. القهوه بالذات ممكن تقلل الاحساس بالجوع.
٤. الصيام المتقطع مفيد و لا لأ؟
الصيام المتقطع ليه فوايد كتير زي:
- طبعا اهم ميزه انه بيقلل الوزن
- بيقلل مقاومه الانسولين بحيث انه بيقلل نسبه السكر في الدم و نسبه الانسولين و ده الي ممكن يقلل احتماليه مرض السكر النوع التاني
- ممكن يقلل نسبه الدهون الضاره في الدم
- ممكن يساعد في حمايه المخ و يمنع حصول امراض زي الزهايمر
- ممكن يقلل نسبه حصول سرطان.
٥. طيب الصيام المتقطع نظام كويس للتخسيس و لا لأ؟
الصيام المتقطع ممكن يكون وسيله كويسه جدا للتخسيس مقارنه بباقي نظم التخسيس. الصيام المتقطع ممكن ينزل الوزن من ٣ ل٨ في الميه في خلال من ٣ ل ٢٤ اسبوع. ده غير ان النظام المتقطع بيزود نسبه الحرق في الجسم و ممكن يقلل الدهون الي في الوسط. برده الصيام المتقطع متميز عن باقي انظمه التخسيس انه مبيقللش كتله العضل في الجسم زي باقي الأنظمه.
٦. اقدر اكل اي حاجه في فتره الاكل في الصيام المتقطع؟
المفروض تاكل اكل صحي على قد ما تقدر في فتره الاكل في الصيام المتقطع. لو كلت كتير جدا عن الطبيعي بتاعك في فتره الاكل فأنت كده ممكن متخسش.
الصيام المتقطع نظام كويس جدا للتخسيس خاصه للرجاله بس مش كل الناس هتلاقيه مناسب ليها و فيه ناس متحبش تصوم الفتره دي كل يوم فاختار النظام الي يناسبك الي تقدر تمشي عليه و يساعدك في تقليل الوزن.
اتمني الموضوع يكون عجبكم و عرفتوا أكتر عن الصيام المتقطع
ممكن كمان يعجبك موضوعنا عن أدوية التخسيس و هل فعلا بتخسس؟
تعليقات
إرسال تعليق