احتياطات لازم تخدي بالك منها و انتي بتعملي اختبار الحمل في البول

 لو عملتي اختبار الحمل وظهر معاكي شرطة خفيفة ومش عارفة تحددي هل إنت حامل أو لأ ركزي معانا في المقال اوي وهنعرفك إزاي تحددي الشرطة الخفيفة دي حمل أو مش حمل

 الأول خلينا نقول لك إزاي تعملي اختبار الحمل صح. اختبار الحمل لازم يتعمل على بول الصباح الي هو البول إللي بتعمليه أول ما بتصحى من النوم لأن ده بيكون فيه أعلى تركيز لهرمون الحمل

تاني حاجة كل ما تأخري اليوم اللي عملتي فيه اختبار الحمل بعد ميعاد الدورة كل ما تكون نتيجة اختبار الحمل في البول أدق. وده معناه إن إنت لو عملتي اختبار الحمل في البول قبل ميعاد الدورة النتيجة مش هتكون دقيقة جدا

 لو خليتي  بالك من النقطتين دول وعملتي اختبار الحمل ورغم كده ظهر معاكي شرطة خفيفة .إيه معنى الشرطة الخفيفة دي؟

 لو أول ما حطيتي البول في الاختبار وظهرت الشرطة الخفيفة خلال 5 دقائق فده معناه إن إنت مبروك حامل في بداية الحمل. إنما لو حطيتي البول واستنيتي لحد 10 دقايق ومظهرتش أي شرطة وبعد كده سيبتي الاختبار مدة وظهرت الشرطة بعد كده ده معناه إن ده خطأ من اختبار الحمل و إن الاختبار مش دقيق و منقدرش نعتمد عليه

 ركزي معايا بقولك إن الاختبار مش دقيق يعني ده مش معناه إن إنت حامل أو مش حامل ده معناه إن إحنا محتاجين نعيد الاختبار أو نعمل الاختبار في الدم عشان يكون أكتر دقة.