قسطرة القلب من اليد هي عملية جراحية بتتعمل لتصوير الشرايين التاجية الي بتغذي القلب و ممكن من خلالها بيتم عمل توسيع للشرايين التاجية أو تركيب دعامات. قسطرة القلب ممكن تتعمل من الفخد كمان. في الموضوع ده هنتكلم أكتر عن قسطرة القلب عن طريق اليد و ايه هي مميزاتها و خطواتها.
١. ايه هي خطوات قسطرة القلب من اليد؟
خطوات قسطرة القلب من اليد هي
- الطبيب الأول بيفحص الشريان الكعبري في الايدين و يتأكد ان مفيش مشكلة في سريان الدم فيه و بيختار الايد المناسبة أفضل للعمليه
- الايد بتتحط في وضعية الانبساط و بيتحط تحتها مخده صغيرة.
- الايد بتتعقم بمادة معقمه زي البيتادين.
- الدكتور ممكن يعطى دوا مهدئ و بعدين بيحقن بنج موضعي في الايد و المريض بيبقى فايق خلال العملية.
- الدكتور بيحط حاجه زي الكانيولا اسمها شيث في الشريان و الي من خلالها بيدخل قسطرة القلب عشان يصور الشرايين التاجية و ممكن يعمل اجراء علاجي زي توسيع الشرايين بالبالون أو تركيب دعامات.
- بعد العملية الدكتور بيحط حاجة زي الساعة بتضغط على مكان الشيث و بيشيل الشيث و بيسيب الساعه الي ضاغطه و بيتخف عليها بالتدريخ في الساعات الي بعد العملية لغاية لما تتشال تماما.
٢. ايه هي مميزات قسطرة القلب من اليد؟
قسطرة القلب من اليد ليها مميزات كتير و هي الي بينصح بيها معظم جمعيات القلب العالمية زي جمعية القلب الأوروبية و ليها مميزات زي:
- مضاعفات أقل زي النزيف و التجمعات الدموية مش زي قسطره القلب من الفخد الي ممكن يحصل منها مضاعفات أكتر زي النزيف.
- المريض يقدر يتحرك مش ذي قسطرة القلب عن طريق الفخد الي المريض بيضطر يفضل نايم و ميتحركش لمده من ٦ ساعات ل١٢ ساعه على حسب طبيعة العملية.
٣. امتى الدكتور ممكن ميعملش قسطره القلب من اليد و يعملها من الفخد؟
في أسباب كتير بتخلي الدكتور يتستبعد قسطرة القلب من اليد و يعملها من الفخد زي:
- مشكله في شرايين اليد زي ضيق أو سدد أو اعوجاج في الشرايين
- في عمليات معقدة زي تركيب دعامتين في بعض أو تكس شديد في الشرايين و غيرها ممكن الدكتور يفضل قسطره القلب من الفخد و مش من اليد لأنها بتساعده أكتر.
- حصول مضاعفه من قسطرة القلب زي تقلص الشريان على القسطرة فساعتها الدكتور مبيقدرش يكمل العملية من اليد و يضطر يكمل من شريان الفخد
٤. المريض بيروح بعد اد ايه من عمل قسطره القلب من اليد؟
في القسطره التشخيصية من خلال اليد الي مبيبقاش فيها تدخل علاجي ممكن المريض يروح بعد ساعات لكن لو تم عمل توسيع أو تركيب دعامات في الشرايين التاجية ممكن المريض يقعد في المستشفى فترة أكبر للملاحظة و ممكن يبات و يروح تاني يوم و ده الدكتور الي بيحدده طبقا لطبيعة العملية.
اتمني ان تكونوا عرفتوا أكتر عن قسطرة القلب من اليد و ايه هي مميزاتها و خطواتها. اعملوا شير للموضوع عشان الناس تعرف أكتر غن قسطرة القلب من اليد
