البلح معروف عنه أنه مفيد للصحة و مغذي بس ايه هي فوايده بالظبط؟ في الموضوع هنتكلم بالتفصيل عن ٧ فوايد للبلح مثبتة علميا.
١. قيمة غذائية عالية.
البلح فيه قيمة غذائيه عالية جدا و دا نتيجه انه فية نسبة عالية من السعرات الحرارية. غير كده فيه نسبة بسيطة من البروتين و فيه برده أملاح مهمة جدا للصحة زي الماغنسيوم و البوتاسيوم و الحديد و المنغانيز. غير إنه فيه نسبة من فيتامين ب
٢. غني بالألياف.
البلح فيه نسبة علية من الألياف و الألياف أهميتها انها بتساعد عملية الهضم و بتقلل الامساك و فية دراسه اثبتت ان الناس الي ياكلوا ٧ بلحات في البوم قللت عندهم الامساك و عسر الهضم. غير كدة الألياف الي في البلح مفيدة للتحكم في نسبة الجلوكوز في الدم.
٣. غني بمضادات الأكسدة.
البلح غني جدا بمضادات الأكسده و مضادات الأكسدة فايدتها إنها بتحمي خلايا الجسم من المؤكسدات الي بتأذي خلايا الجسم و بتسبب أمراض زي الزهايمر و السرطان و السكر و بتأثر على الصحة بشكل عام.
٤. مفيد للمخ.
البلح مفيد للمخ عن طريق أنه بيمنع حصول ترسبات في المخ و الي ممكن تسبب أمراض زي الزهايمر ده غير أن البلح فيه مواد مضادة للأكسده و الي بتحسن الذاكرة و قدرات التعلم.
٥. بيساعد في الولادة الطبيعي.
دراسات كتير أثبتت ان الستات الي بياكلوا بلح بانتظام في الأسابيع الأخيره في الحمل بيساعد في الولاده الطبيعي و على اتساع عنق الرحم و بيقلل وقت الولاده. دا بسبب ان البلح فيه مواد بتشابه هرمون الاوكسيتوسين و دا الي بيزود الطلق و بيزود انقباضات الرحم.
٦. محلى طبيعي.
دا لأن البلح فيه ماده الفركتوز الي هي نوع طبيعي من السكر. البلح محلى أفضل من السكر لأنه صحي و فيه مواد تانية مفيدة زي الأملاح و الفيتامينات.
٧. عضم صحي.
دا لأن زي ما قولنا البلح فيه أملاح زي الكالسيوم و الماغنسيوم الي هما مكونات مهمه في تكوين العظام و بيقللوا نسبه حصول هشاشه العظام.
اتمني تكونوا عرفتوا أكتر عن فوايد البلح المثبتة علميا و تزودوا من أكلكم للبلح.
