الكلى هي عضو في جسم الانسان على شكل حبايتين فول بيساعدوا الجسم انه يتخلص من المياه الزايده و الفضلات و السموم. لو حصل قصور أو مشكله في الكلى ده بيسبب زياده في المياه و السموم في جسم الانسان و ده بيكون نتيجه لأسباب زي ارتفاع الضغط أو السكر أو غيرها و هنتكلم عنها بالتفصيل في الموضوع ده.
١. ايه هي الأعراض المبكره الي بتدل على مشكله في الكلى؟
معظم حالات قصور الكلى مبيبقاش عندهم أعراض في الأول و ممكن يكتشفوها صدفه و هما بيعملوا تحاليل لسبب تاني و لكن مع زياده القصور في الكلي بيظهر أعراض زي:
- رغاوي في البول: دي من أول الأعراض الي بتظهر نتيجه مشكله في الكلى و بتظهر على شكل رغاوي كذا طبقه حجمها متوسط و بتقعد فتره و ده بيبقى نتيجه ان البروتين بيبتدي ينزل في البول و هو في الطبيعي مبينزلش.
- التبول كتير اثناء الليل.
- التورم و ده بيحصل في الرجلين و ممكن بنسبه أقل في الايدين أو الوجه.
- ارهاق و ضعف تركيز.
- ضيق في التنفس.
- الم في العظام و المفاصل و ده بيكون نتيجه خلل في الأملاح و الهرمونات المسؤولة عن العظام.
- في أعراض تانيه زي انيميا أو أكلان في الجلد أو غممان أو ترجيع أو ضعف الشهيه أو نقصان في الوزن أو شد عضلي.
٢. ايه هي أسباب مشاكل الكلى؟
اسباب مشاكل أو قصور الكلي كتير من أهمهم
- ارتفاع الضغط المزمن.
- مرض السكر.
- ارتفاع في الدهون.
- استخدام المسكنات كتير زي البروفين أو كيتولاك و زيها كتير و عشان كده لازم يكون استخدام المسكنات في أضيق الحدود و بعد الرجوع للطبيب.
- حصوات في الكلي مسببه سدد في سريان البول.
- التهاب في الكلى.
- عوامل وراثيه زي وجود أكياس في الكلى.
- فيه أسباب تانية زي التدخين أو نظام غذائي فيه ملح كتير أو شرب مشروبات غازية كتير أو أمراض مناعية.
٣. ايه هي الفحوصات الي بتشخص مشاكل في الكلى؟
لو حسيت بأعراض من الي قولنا عليها بتروح للدكتور لأن فيه أمراض تانية ممكن تسبب نفس الأعراض.
الدكتور ممكن يطلب تحاليل دم منها تحليل وظائف كلى و تحليل بول و ممكن يطلب منك تتابع ضغط الدم بشكل منتظم.
ممكن برده يطلب على حسب الحاله موجات صوتيه على البطن و الحوض أو أشعه مقطعيه على البطن أو رنين مغناطيسي.
بكده نبقى اتكلمنا على الأعراض المبكرة لقصور الكلى و ايه هي أسبابها و هنتكلم في موضوع تاني عن ايه هي طرق العلاج و الأنظمه الغذائية المناسبة لمريض الكلى
تعليقات
إرسال تعليق