فيتامين د أو فيتامين الشمس زي مبيتقال عليه هو فيتامين مرتبط بالكالسيوم و تخزينه في العضم و مرتبط كمان بالمناعه و مضاد للأكسده و الالتهابات و نمو الخلايا. في الفتره الأخيره ناس كتير مهتمه بفيتامين د و بتعمل تحاليل عشان تشوف نسبته فعشان كده في الموضوع ده هنتكلم عن فيتامين د و نصحح المعلومات الغلط عنه.
١. ايه هي أعراض نقص فيتامين د؟
أعراض نقص فيتامين د من ضمنها الام في العضم او كسر او هشاشه في العظام او وجع في العضلات.
٢. هل الارهاق او الاكتئاب ممكن يكون عرض من اعراض فيتامين د؟
ممكن. فيتامين د ليه دور في افراز هرمون السريتونين و ده هرمون بينظم النوم و المود العام و فيه دراسه اثبتت ان الاكتئاب ممكن يكون معاه نقص في فيتامين د.
٣. ايه هو الحاجه الطبيعيه الي اخدها عشان ازود فيتامين د؟
فيه اكل معين فيه نسبه اكبر من فيتامين د زي السمك و البيض و المشروم بس المصدر الأكبر هو التعرض للشمس لأن بتعرضك للشمس فيه مكون في جلدك اشعه الشمس بتحوله لفيتامين د.
٤. هل ممكن اعتمد على الاكل بس عشان ازود نسبه فيتامين د؟
غلط. لازم جسمك يتعرض للشمس من ربع لنص ساعه يوميا عشان توفر الجزء الأساسي من فيتامين د لجسمك و الاكل عامل مساعد. فحاول وشك و دراعاتك و رجليك للشمس من ربع لنص ساعه يوميا عشان توفر فيتامين د لجسمك.
٥. طيب ممكن احتاج علاج لفيتامين د؟
الدكتور ممكن يكتبلك فيتامين د لو فيه نقص شديد في فيتامين د الي هو في معظم المعامل بيبقى اقل من ٢٠ او فيه نقص في حدود من ٢٠ ل٥٠ و معاه أعراض زي كسور في العضم او هشاشه عظام. الاحتياج اليومي للجسم ٦٠٠ وحده من فيتامين د. فضروري تمشي على الجرعه الي الدكتور كتبها لأن كتره مش أحسن و لا حاجه و ممكن يعمل مشاكل.
٦. هل كل الناس محتاجه تعمل تحليل فيتامين د؟
لا طبعا. الدكتور هو الي ممكن يطلبه بناءا على اعراض معينه زي كيور او الم في العضم او تعب في العضلات او ارهاق شديد.
في العموم التعرض للشمس فتره كفايه كل يوم مع اكل صحي و مكونات زي البيض و السمك هيوفر لجسمك النسبه الكفايه من فيتامين د.
يا رب يكون الموضوع مفيدو عرفتوا اكتر عن فيتامين د و أعراض نقصه و ازاي تتعامل معاه.
تعليقات
إرسال تعليق