الصفرا عند الرضع الي لسه مولودين مشكله بتواجه ناس كتير و مبيكونوش عارفين ايه اعراضها و ازاي يتعاملوا معاها. في الموضوع ده هنتكلم عن الصفرا في الرضع و اعراضها و ازاي نتعامل معاها.
١. ايه هي أسباب الصفرا في الرضع؟
السبب الأساسي في الصفرا في الرضع هو ان كرات الدم في البيبي بتتكسر بسرعه فبيطلع بليروبين و الكبدمبيكونش حصله نمو بالشكل الكافي فمبيقدرش يصرف البليروبين الامعاء بالشكل الطبيعي فبالتالي بيحصل صفرا.
٢. ايه هي أعراض الصفرا؟
من اسمها الصفرا و بتبان أكتر في الوش و في العينين. في أعراض تانيه و دي بما تكون الصفرا شديده زي السخونيه و الطفل مبيرضعش كويس أو انه يتني رقبته او ضهره لورا و دي علامات خطر و لازم تروحي للدكتور على طول.
٣. امتى بتظهر اعراض الصفرا؟
اعراض الصفرا بتظهر في الغالب من يومين لخمس ايام و دي بيبقى نوع الصفرا الطبيعي اما لو ظهرت في اول يوم من الولاده فدي ممكن تكون صفرا مرضيه و ليها اسباب زي ان الام تكون مريضه سكر اثناء الحمل او ان الطفل يكون عنده خمول في الغده الدرقيه او انسداد في الامعاء او صفرا بسبب لبن الام و دي كلها اسباب الدكتور بيدور عليها بالفحوصات و التحاليل لو شك ان الصفرا مرضيه.
٤. هل الصفرا خطيره؟
في الغالب الصفرا بتروح خلال اسابيع و ممكن يساعد ان الرضاعه تبقى على الاكل ٨ مرات في اليوم عشان البليروبين الي بيعمل الصفرا ينزل في البراز. الدكتور ممكن يطلب تحليل الصفرا عن طريق الدم او الجهاز الي بيقيسها من الجلد و ممكن لو الرقم عالي (في الغالب اكتر من ١٥) او الرقم بيعلى الدكتور يطلب ان الطفل يتعالج في الحضانه عن طريق انه بيتعرض لاضاءه خاصه بتكسر البليروبين في الجسم و تقلل الصفرا. الدكتور برده لو شك ان الصفرا سببها مرضي بيطلب فحوصات او تحاليل عشان يعالج السبب. الصفرا لو عليت جدا و متعالجتش ممكن تسبب لا قدر بضرر دايم في المخ فعشان كدا لازم الام تروح للدكتور لو طفل ظهر عليه صفرا عشان يتعالج صح.
٥. مين أكتر أطفال معرضين للصفرا؟
اكتر اطفال معرضين هما:
- الاطفال المولدين قبل معادهم
- الاطفال الي ليهم اخوات اتولدوا قبل كده بصفرا
