ناس كتير بتعاني من أمراض المرارة و بتسببلهم تعب و مشاكل كتيره. في الموضوع ده هنتكلم عن أمراض المرارة و أعراضها و ازاي بتتعالج.
١. ايه هي المرارة؟
المرارة هي عضو صغير تحت الكبد بيتخزن فيه العصاره الصفراوية الي بينتجها الكبد و بتنزل في الامعاء عشان تساعد على تكسير و امتصاص الدهون.
٢. ايه هي أسباب أمراض المرارة؟
أمراض المرارة ليها أسباب كتير زي:
- التهاب المرارة و ده ممكن يكون حاد أو مزمن و بيكون نتيجه حصوات المرارة أو التهاب أو ورم في الكبد أو البنكرياس و عامل ضغط على القنوات المرارية.
- حصوات المرارة و دي معظمها بيكون تراكم الكوليسترول فبيكون حصوه.
- حصوات القنوات المرارية و دي بتبقى حصوه اتحركت من المراره و سدت القنوات المرارية في اغلب الحالات.
٣. ايه هي أعراض المرارة؟
أعراض المرارة كتير زي:
- الم في البطن و بيبقى في النص الفوقاني من البطن أو الجزء اليمين الي فوق من البطن.
- غممان و ترجيع
- سخونيه.
- اسهال و ممكن يكون اكتر من ٤ مرات في اليوم
- البراز بيبقى لونه باهت
- البول ممكن يبقى لونه غامق
٤. ازاي أمراض المرارة بتتشخص؟
الدكتور بعد ما بياخد التاريخ المرضي و يعمل فحص ممكن يطلب تحاليل دم و فحوصات زي:
- سونار على البطن و الحوض
- آشعه مقطعية على البطن
- رنين مغناطيسي على البطن
- منظار عشان يشخص و يعالج حصوات المرارة
٥. ازاي بتتعالج المرارة؟
فيه علاجات كتيره للمرارة على حسب أسبابها حصوات أو التهاب أو ورم و الدكتور بيحدد انهي علاج أفضل لحالتك زي:
- الجراحه و دي في الأغلب عشان ازاله حصولت المرارة الي عامله أعراض.
- تفتيت الحصوات بالليزر
- مضادات حيويه لو فيه التهاب
- أدويه مسكنه الدكتور بيكتبها على حسب الحالة زي البروفين
٦. هل فيه أكل ابعد عنه لو عندي المرارة؟
طبعا. لازم تبعد عن الأكل الي ممكن يزود الأعراض زي الأكل المسبك و المقلي و الي فيه دهون كتير. و برده يفصدضل نبعد عن الأكل الي فيه سكر كتير و العيش الفينو.
٧. و فيه أكل أو شرب بيساعدو مع المرارة؟
ايوه. المفروض تزود من الفواكه الي فيها فيتامين سي و تزود الخضار و الحاجات الغنيه بالكالسيوم زي اللبن خالي الدسم و الاكل الي فيه دهون صحية زي المكسرات.
كمان القهوه بتقلل فرصه ان يجيلك أمراض المرارة
يا ريت الموضوع يكون عجبكم و تكونوا عرفتوا أكتر عن أمراض المرارة و أسبابها و أعراضها و ازاي بتتعالج.
