برد المعده هو عباره عن فيروس بيصيب المعده فبيسبب الأعراض زي السخونيه و الترجيع و هنتكلم عنها بالتفصيل. ملوش علاقه بدور البرد العادي الي بيحصل نتيجه فيروس الانفلونزا.
طب ايه هي اعراض برد المعده او النزله المعويه و ازاي اعالجها؟ ده الي هنتكلم عليه
١. ايه هي أعراض برد المعده؟
أعراض برد المعده بتكون سخونيه و اسهال و وجع في البطن وممكن يكون معاه ترجيع و غمه النفس و الشخص ممكن يحس انه مرهق جدا و مش قابل الاكل
٢. ايه المشروبات الي ممكن اشربها في دور برد المعده؟
فيه مشروبات كتيره مع المياه تعوض السوايل الي جسمك بيفقدها من الترجيع و الاسهال زي النعناع و اليانسون و ممكن سفن اب عشان تعوض الاملاح الي جسمك بيفقدها. المياه و السوايل مهمه جدا في دور برد المعده عشان ميحصلش جفاف و الدور يخف اسرع
٣. طب ايه المشروبات الممنوعه في برد المعده؟
حاول تبعد عن القهوه و الشاي على قد ما تقدر عشان دول ممكن يتعبوا البطن زياده و كمان بيخلوا الشخص مينامس كويس و الواحد بيحتاج نوم كتير عشان الجسم يقدر يقاوم برد المعده و يخف اسرع
٤. و ايه هي المأكولات الي ممكن اكلها في برد المعده؟
الموز مفيد جدا و بيساعد في تقليل الاسهال و بيعوض الاملاح الي بتفقدها. الرز الابيض برده بيقلل الاسهال و فيه كربوهيدرات الي هي مصدر الطاقه للجسم. كمان العيش التوست بالتحديد خفيف على المعده
٥. و ايه المأكولات الي ابعد عنها؟
حاول تبعد عن الاكل المشطشط و عن العيش الفينو عشان تقيل على المعده. برده ابعد عن الحوادق و الاكل المسبك و منتجات الالبان في دور برد المعده
٦. هل ابتدي مضاد حيوي اول لما يجيلي برد المعده عشان اخف بسرعه؟
لأ. دا فيروس بيصيب المعده و الجسم بيقاومه و بيقدر يتغلب عليه مع الراحه و شرب سوايل كتبر و تخفيف الاكل المتعب للمعده. فلو خدت علاج من الاول زي المضاد الحيوي فده ملوش لازمه لأن دي عدوى فيروس في الأغلب و المضاد الحيوي بيشتغل على البكتيريا و ممكن يزود تعب المعده
٧. معنى كده ماخدش علاج خالص في برده المعده؟
لأ ممكن تاخد طبعا لو فيه سخونيه مبتنزلش خافض حراره زي البنادول او البارامول و بلاش الادويه الي فيها بروفين زي كاتافاست لأن دي ممكن تتعب الكلى خاصه انك ممكن يكون عندك نقص سوايل من دور برد المعده. ممكن برده الدكتور يكتبلك على برشام للترجيع لو ما بيقلش.
٨. طيب امتى اروح للدكتور لو عندي برد معده؟
في العادي مع الراحه و السوايل المفروض تبتدي تحس بتحسن في خلال يومين. لو حسيت انك مدروخ جامد او الحراره اعلى من ٣٨.٥ او الاعراض مبتتحسنش او بتسوء بعد يومين لازم تروح للدكتور.
دور برد المعده دور سخيف و كلنا بنتعرضله فلو جالك حاول تتبع النصايح الي قولناها و تحاول تريح راحه تامه و تنام كويس عشان جسمك يقدر يتغلب على برد المعده في اسرع وقت ان شاء الله.
اعمل شير لو عجبك الموضوع و عشان تنشر المعلومات و متنساش تسيب تعليق تحت.
ممكن كمان تشوف مقالنا عن ارتجاع المرئ و أسبابه و طرق العلاج
