مرض الضغط العالي ده مرض منتشر جدا موجود عند تقريبا تلت الناس في العالم كله. برغم أنه مرض منشر جدا كتير من الناس عندهم مفاهيم غلط عن مرض ارتفاع الضغط و ده الي هنتكلم عليه في الموضوع ده.
١. ايه هو مرض الضغط العالي؟
الضغط العالي هو عباره عن تصلب في الشرايين الي بتغذي اجزاء الجسم فبالتالي بترفع الضغط. الطبيعي الضغط بيبقى في حدود ١٢٠/٨٠ لو الرقم الكبير زاد عن ١٤٠ أو الصغير زاد عن ٩٠ أو الاتنين مع بعض ده كده مريض ضغط.
٢. هل الصداع هو أكتر عرض بيحصل لمريض الضغط؟
لأ دا اعتقاد غلط. ممكن مريض الضغط يحس بصداع أو نزيف من المناخير أو رفرفه في ضربات القلب بس ده في الأغلب لو ضغطه عالي جدا انما في معظم الحالات الضغط مالوش أعراض و بيكتشف صدفه.
٣. انا اهتم ليه لو عندي ضغط عالي؟
لازم تهتم و تعالج الضغط و تتابعه باستمرار لأنه لو متعالجش ممكن يسبب مشاكل كتير في القلب و الكلى و الأوعيه الدمويه و ممكن يسبب جلطه في المخ.
٤. هل فيه شفاء نهائي من مرض الضغط العالي؟
للأسف لا.بس الحمد لله مرض الضغط لو اتابع و اتعالج باستمرار بيتسيطر عليه و مبيعملش مضاعفات.
٥. طيب انا باخد أدويه ضغط و ضغطى واطي دلوقتى. أوقف العلاج؟
لأ طبعا. تتابع مع الدكتور عشان يظبط جرعات الأدويه أو يكتبلك نوع تاني بس متوقفش العلاج أبدا لوحدك عشان ده ممكن يعمل ارتفاع حاد في الضغط.
٦. هل مرض الضغط العالي وراثيي؟
ايوه. من ٣٠ ل ٥٠ في الميه من حالات الضغط بتكون وراثيه. فلو عندك حد قريب درجه أولى عنده ضغط زي الأم أو الأب فاحتمال يجيلك ضغط. بس متقلقش لأن مرض الضغط علاجه بسيط ان شاء الله.
٧. هل العصبيه و التوتر ممكن تسبب ضغط عالي؟
ايوه. العصبيه و التوتر ممكن يعملوا ارتفاع شديد في الضغط بس مش مزمن. بمعنى مجرد ما العصبيه و التوتر يروحوا الضغط فى الغالب بيرجع طبيعي.
٨. هل التغييرات في نظام حياتي ممكن تساعد في علاج الضغط؟
طبعا. التغييرات في نظام حياتك مهمه جدا زي المشي لمده نص ساعه كل يوم و النزول في الوزن و لو بتدخن تبطل تدخين. كنا اتكلمنا في موضوع قبل كده عن أفضل نظام غذائي ممتاز لمرضى الضغط ممكن تدخل عليه من اللينك ده. افتكر ان جزء مهم جدا من عباج الضغط عو التغييرات في نظام حياتك و نفس الأهميه زي الأدويه
٩. ايه العلاجات الي بتتاخد لمرض الضغط؟
فيه انواع كتيره من الادويه ممكن الدكتور يكتبهالك على حسب حالتك الصحيه و الفحص و لو فيه أمرا تانيه عندك بس مهم انك مبتبتديش او تغير علاج الضغط غير لما تكشف عند دكتور.
١٠. هل الضغط العالي بيسبب ضعف جنسي؟
ايوه الضغط العالي ممكن يسبب ضعف جنسي بس ممكن بيتعالج و يروح لو تم معالجه الضغط العالي.
تعليقات
إرسال تعليق