انيميا نقص الحديد منتشره عند ناس كتير جدا و خاصه عند الستات و الحوامل و الأطفال. الحدبد جزء مهم من حاجه اسمها هيموجلوبين و ده مكون رئيسي في كرات الدم الحمرا فنقصه بيسبب انيميا. و ده بيكون بسبب سوء تغذية أو نقص الحديد في الأكل أو سوء امتصاص للحديد أو نتيجه حمل أو نزيف دم. في الموضوع هنتكلم عن أعراض انيميا نقص الحديد و ازاي نعالجها بشكل طبيعي.
١. ايه هي أعراض انيميا نقص الحديد؟
أعراض كتيره زي همدان في الجسم و ارهاق مستمر و صداع و عدم تركيز (ده بيسبب تحصيل مش كويس للأطفال في المذاكره) أو ضربات القلب بتبقى سريعه أو الم في الصدر أو ضيق في النفس و عند الاطفال ممكن يكونوا عايزين ياكلوا حاجات غريبه زي التراب.
٢. انا عندي الاعراض دي اعمل ايه عشان اتأكد اني عندي انيميا نقص الحديد؟
لما تروح للدكتور هيطلب تحاليل عشان يتأكد زي صوره الدم و مستوى الحديد في الدم.
٣. طيب انا عندي انيميا نقص الحديد نتيجه سوء تغذيه اتعامل معاه ازاي؟
نزود في الاكل الي فيه حديد كتير زي اللحوم و الكبده و الخضار زي السلطه الخضرا و البقوليات. حاجه تانيه مهمه ان نتجنب شرب القهوه الشاي بعد الاكل و بلاش اللبن بعد الاكل عشان فيه كالسيوم و الكالسيوم بيقلل امتصاص الحديد.
كمان نزود من الفاكهه الي فيها فيتامين سي زي البرتقال و اللمون لأنها بتزود امتصاص الحديد
٤. امتى الجأ للعلاج عشان اعالج نقص الحديد؟
الدكتور ممكن يشوف ان الانيميا شديده و هتبقى استجابتها بطيئة للنظام الغذائي الصح لوحده أو لواحده حامل فممكن يزود اقراص او شراب حديد لطفلك أو حتى حقن حديد في حالات خاصه الدكتور هو الي بيحددلها انها تاخد حقن. و في كل حال من الاحوال تعديل النظام الغذائي زي ما اتكلمنا مهم جدا عشان نعالج انيميا نقص الحديد و مترجعش تاني
اتمني تكونوا استفدتوا من الموضوع و لو عجبكم متنسوش تعملوا شير عشان تنشروا المعلومه
