الحمى الروماتزميه هو مرض بييجي لكتير من الاطفال خاصه في مصر و الدول العربية. في المقال ده هنتكلم عن ايه هي الحمى الروماتزميه و ايه اسبابها و أعراضها و ازاي نتجنبها.
١. ايه هى الحمى الروماتزميه؟
الحمى الروماتزميه هي التهاب بيصيب القلب أو الجهاز العصبي أو المفاصل نتيجه اصابه قبل كده بالتهاب الزور ببكتيريا معينه و متعالجش او اتعالج بس المريض مكملش مده المضاد الحيوي الي الدكتور قال عليها. لو متعالجتش صح عن طريق الطبيب ممكن تعمل مشاكل مزمنه في صمامات القلب.
٢. ايه هي أعراض الحمى الروماتزميه؟
في أعراض كتير للحمى الروماتزميه مش لازم كلهم يبقوا موجودين و من اسمها ممكن يبقى فيه سخونيه. ممكن برده يبقى فيه ضربات قلب سريعه او الم في الصدر او الم في مفصل و بعدين يخف المفصل و يروح الالم لمفصل تاني. ممكن كمان يبقى فيه كلاكيع مبتعملش وجع تحت الجلد أو حركات لا اراديه في الايدين او الرجلين.
٣. طيب ازاي اقدر اعالجها؟
اولا خير وسيله للعلاج هي منع السبب من الاول فعشان كده لو طفلك جاله التهاب في الزور او التهاب في اللوز و معاه .حراره لازم تروحي للدكتور على طول.
ثانيا لو ظهرت اي أعراض من أعراض الحمى الروماتزميه لازم تروحي للدكتور.
٤. الدكتور بيشخص الحمى الروماتزميه ازاي و علاجها ايه؟
الدكتور هيعمل فحص دقيق و هياخد التاريخ المرضي لأي التهاب لوز قبل كده و ممكن يطب فحوصات زي رسم قلب و موجات صوتية على القلب و بعض التحاليل و بناءا عليها ممكن يوصل لتشخيص حمى روماتزميه و يبتدي علاج زي حقن البنسيللين طويل المفعول و دي بتبقى حقنه كل شهر تقريبا لفتره طويله بيحددها الدكتور بيحددها عشان تحمى القلب من الضرر الي ممكن يحصل لصمامات القلب.
٥. ازاي امنع الحمى الروماتزميه من الاول؟
اهم حاجه لو ابنك او بنتك جالهم التهاب لوز او التهاب في الزور انك تروحي للدكتور فورا و تمشي على المضاد الحيوي .لو كتبه الفتره كلها الي قال عليها
اتمنى ان يكون الموضوع و عرفتوا اكتر عن الحمى الروماتزميه و ازاي نمنعها.
