النقرس هو نوع من انواع الالتهابات الي بتصيب المفاصل و بتسبب ازعاج كبير للي عنده. في للموضوع ده هنتكلم اكتر عن النقرس و الاكل الي بيسببه و ازاي نعالجه بطريقه صح.
١. ايه هي اسباب النقرس؟
النقرس بيحصل نتيجه تكوين كريستالات من حمض اليوريك و بتترسب في المفاصل زي مفصل الصباع الكبير في الرجل او مفصل القدم او الايد او مفصل الركبه. حمض اليوريك في الطبيعي بيدوب و بينزل من الكلى فزياده حمض اليوريك بيكون يا اما زياده تكوين الجسم ليه و ده بيكون بسبب زياده مصادره من الاكل او الكلي مبتفرزش حمض اليوريك كويس.
٢. مين الناس المعرضه اكتر لمرض النقرس؟
الناس المعرضه للنقرس اكتر الي عندهم زياده في الوزن او عندهم وراثي في العيله او عندهم امراض مزمنه زي الضغط و السكر او الي باخدوا ادويه بتزود النقرس زي ادويه معينه من ادويه الضغط. في العموم الرجاله معرضين اكتر للنقرس و بيجيلهم غالبا من سن ٣٠ ل ٥٠ بس الستات نسبه ان يجيلهم نقرس بتزيد بعد سن الطمث.
٣. ايه الاكل الممنوع في النقرس؟
في اكلات معينه بتزود نسبه حمض اليوريك و المفضل الابتعاد عنها زي اللحمه الحمرا و الوز و البط و التونا.
٤. طيب و ايه المشروبات الممنوعه في النقرس؟
مهم جدا الابتعاد عن المشروبات الي بيتحط عليها سكر خارجي و العصاير المصنعه لانها بتسبب زياده في حمض اليوريك ده غير انها بتسبب زياده في الوزن و بتضر بالشخص الي عنده سكر
٥. هل الشاي و القهوه ممنوعين في النقرس؟
لا مش ممنوعين الا لو محطوط عليهم سكر من بره زي ما قولنا و هي دي المشكله فيهم مش المشكله في القهوه و الشاي. بل بالعكس القهوه ممكن تقلل النقرس.
٦. ايه الاكل و الشرب للنقرس عشان يقلله؟
في العموم المفروض تاكل وجبات صحيه متوازنه و تشرب مياه كتير و تزود من الخضروات و الفاكهه و تبعد عن المشروبات الي بتحط عليها سكر من بره. الدراسات اثبتت برده ان الاكل الي فيه فيتامين سي زي البرتقال و الليمون بيقلل نسبه حدوث النقرس. برده الكريز فيه مضادات للأكسده و ممكن يساعد مع النقرس
٧. ايه الادويه الي ممكن تتاخد عشان النقرس؟
الدكتور ممكن يكتبلك ادويه عشان الالم زي المسكنات منها بروفين او بارسيتامول. ممكن برده يكتبلك ادويه تقلل الالتهاب في المفاصل في وقت الالم زي الكولشيسين و ممكن يكتب ادويه عشان تمنع حدوث النقرس تاني زي الزيلوريك و الفيبيوريك.
اتمني تكونوا استفدتوا من الموضوع ده و عرفتوا اكتر عن النقرس و ازاي تتعاملوا معاه و ايه الاكل و الشرب الي المفروض تبعدوا عنه. لو عجبك الموضوع يا ريت تعمل شير عشان تنتشر المعلومه.
ممكن كمان يعجبك مقالنا عن انيميا نقص الحديد
