نغزات القلب في سن الشباب مشكله بتواجه ناس كتير و مبيكونوش عارفين ايه اسبابها. في الموضوع ده هنتكلم عن سبب نغزات القلب في سن الشباب الي ممكن بتكون مفاجئه و بتسبب الم شديد.
١.ايه هي اسباب نغزات القلب في الشباب؟
في اسباب كتيره جدا زي:
- جلطه أو ذبحه في القلب و دي الأخطر من الأسباب و غالبا بيبقى الألم بتاعها شديد و مبتقدرش تحدد مكانه بالظبط و بيبقى في الصدر عباره عن تقل أو حرقان أو وجع و ممكن يسمع في مكان تاني زي الكتف الشمال أو الذراع أو الظهر أو الرقبه و في الغالب بيقعد كام دقيقه مبيبقاش لحظه و يروح و بيزيد مع المجهود و بيتكرر اكتر من مره.
- ارتجاع المرئ أو عسر هضم و ده بيبقى الألم بتاعه حرقان في الصدر و ممكن يتشابه مع أعراض جاطه أو ذبحه القلب.
- شد في عضلات الصدر أو الم في عضم الصدر و ده ممكن بيكون نتيجه انك شيلت حاجه تقيله أو اتخبط في الصدر و في الغالب الم شديد او نغزه مفاجئه.
- أمراض الصدر زي التهاب في الغشاء الي حوالين الرئة و ده بيعمل الم او نغزه شديده مفاجئه و بيزيد مع النفس أو مع الكحه. في اسباب تانيه زي التهاب الصدر و حساسية الصدر و غيرها.
- نوبات الهلع أو التوتر الشديد و دي بتبقى أعراضها شبه أعراض جلطه أو ذبحه القلب و ممكن يبقى معاها ضربات قلب سريعه و نهجان و قلق شديد بس ممكن تختلف عنها أنها لما بتروح بتختفى تماما و في الغالب مبتسمعش في مكان تاني زي الدراع أو الظهر.
- فيه اسباب تانيه زي التهاب أو حصوات المراره أو التهاب في الجلد الي في الصدر أو مشاكل البنكرياس.
٢. ازاي أعرف ان نغزات القلب الي بتيجي حاجه خطيره؟
أخطر سبب في نغزات القلب و الي لازم يتم علاجه بسرعه هو ذبحه القلب أو جلطه القلب و دي بتبقى أعراضها ان الالم بيكون متوزع على الصدر و مبتقدرش تحدده في نقطه واحده و ممكن يسمع في اماكن تانية زي ما قولنا و بيبقى عباره عن تقل أو حاجه ضاغطه على الصدر و بيقعد دقايق و بيزيد مع المجهود بس طبعا لكل قاعده استثناءات عشان كده لازم لو حسيت بنغزه في الصدر تكشف عند دكتور بسرعه.
في أسباب تانيه خطيره زي جلطه الشريان الرئوي أو التهاب الصدر و الدكتور برده هو الي بيستبعدهم أو بيشك فيهم بالفحوصات.
الاسباب التانيه الأقل خطوره (و دول الأكتر من الحالات) بيعملوا وجع شديد في نقطه واحده في الصدر و في الغالب بيقعد ثواني و مبيسمعش في مكان تاني زي الكتف او الدراع و مبيزدش مع المجهود.
٣. ايه الفحوصات الي الدكتور ممكن يطلبها لو بيجيلي نغزات في القلب؟
زي ما قولنا اخطر سبب هو جلطه أو ذبحه القلب فالدكتور ممكن يطلب رسم قلب و ممكن يطلب تحاليل زي انزيمات القلب و على حسب فحصه للحاله و ايه سبب نغزه القلب ممكن يطلب اشعات زي اشعه عاديه على الصدر او تحاليل.
في النهايه نغزات القلب في الشباب خاصه الي معندهمش أمراض مزمنه زي ضغط أو سكر أو مدخنين أو تاريخ مرضي في العيله بأمراض القلب نسبه قليله جدا منهم بتبقى مشكله في القلب الي هي أخطر أسباب نغزات القلب.
بس طبعا لازم تروح للدكتور فورا لو حسيت بنغزات القلب عشان تشخص الحاله و تستبعد أمراض القلب الي بتبقى أخطرهم و الأمراض الخطيره التانيه زي مشاكل الصدر.
اتمنى تكونوا عرفتوا أكتر عن نغزات القلب في الشباب و أسبابها و ايه أخطر الأسباب.
