رسم القلب بالمجهود هو اختبار بنقيس فيه نشاط القلب وانت بتتحرك، وغالباً بيكون وانت ماشي على مشاية كهربا (treadmill). بنوصل جسمك بأسلاك بتقرا ضربات القلب، ونتابع التغيرات اللي بتحصل وانت بتتحرك.
ليه الدكتور ممكن يطلبه؟
في حالات كتير الدكتور بيحب يطمن على القلب تحت ضغط (يعني وانت بتتحرك)، مش وانت قاعد:
لو بتحس بـ وجع في صدرك لما تمشي أو تطلع سُلَّم
لو عندك أعراض ذبحة صدرية
لو عندك ضيق في الشرايين التاجية وعايزين نعرف درجته
لو عملت عملية في القلب قبل كده وعايزين نتابعك
لو عندك ضربات قلب سريعة أو غير منتظمة
الاختبار بيكشف إيه؟
لو فيه نقص في الدم الواصل للقلب وقت المجهود (يعني فيه شريان ضيق)
بيكشف لو فيه اضطراب في ضربات القلب
بنعرف منه مدى كفاءة القلب وقت المجهود
ساعات بيكون وسيلة نطمن بيها إن القلب شغال كويس قبل ما نسمح بممارسة رياضة أو نعمل عملية
هل فيه خطورة؟
الاختبار آمن جداً، وبيتعمل في وجود دكتور وممرضة، وجهاز الطوارئ بيكون جاهز لو حصل أي حاجة (وده نادراً) و تكون زي الم في الصدر أو اضطراب في ضربات القلب أو تفقد الوعي و دي كلها أعراض نادره. و لازم تقول للدكتور لو:
عندك مشاكل في التنفس
بتاخد أدوية للقلب
عندك ضغط عالي أو سكر
عندك مشاكل في المفاصل
نصايح قبل الاختبار:
ماتكلش وجبة تقيلة قبلها على الأقل بـ ساعتين و متشربش قهوه أو مشروبات فيها كافيين
البس هدوم مريحة وجزمة رياضية
لو بتاخد أدوية للقلب، اسأل الدكتور توقفها ولا تكمل عليها
عايز تعرف أكتر عن وجع الصدر؟
ممكن يهمك تقرأ كمان:
وجع الصدر مش دايمًا من القلب!
هتعرف فيه إمتى تقلق من الوجع، وإمتى يكون حاجة بسيطة.
